Zyrtarja e Departamentit të Shtetit, Naz Durakoglu thekson mbështetjen e Ankarasë për Ukrainën, duke e quajtur atë “parandalues të rëndësishëm ndaj ndikimit të rrezikshëm”
Administrata e Bidenit në korrespondencën e Kongresit deklaroi se shitja e mundshme e avionëve luftarakë F-16 Turqisë do t’u shërbente interesave të SHBA-së dhe do të forconte unitetin e NATO-s, sipas një raporti të publikuar të mërkurën, shkruan AA.
Letra, të cilën e pranoi Reuters, vjen pasi Turqia kërkoi në tetor që Washingtoni t’i shiste asaj 40 F-16 dhe 80 komplete për të modernizuar flotën e saj ekzistuese. Presidenti turk Recep Tayyip Erdoğan në fund të marsit tha se negociatat me SHBA-në po përparonin pozitivisht.
SHBA nën ish-presidentin Donald Trump sanksionoi Turqinë në vitin 2020 pasi Ankaraja bleu sistemin e avancuar rus të mbrojtjes ajrore S-400 dhe e hoqi Turqinë vitin e kaluar nga programi i përbashkët i avionëve sulmues F-35.
SHBA-ja tha se S-400 mund të përdoret nga Rusia për të marrë të dhëna të fshehta për F-35 dhe nuk është i përshtatshëm me sistemet e NATO-s. Megjithatë, Ankaraja pohoi se S-400 nuk do të integrohet në sistemet e NATO-s dhe tha se nuk paraqet rrezik për F-35.
Naz Durakoglu, zyrtarja më e lartë e Departamentit të Shtetit për çështjet legjislative, në letrën e saj drejtuar kongresistit Frank Pallone, pranoi tensionet e vazhdueshme rreth shitjeve shtesë të armëve Turqisë, por tha se sanksionet dhe largimi nga F-35 paraqesin “pagimin e një çmimi të madh” për marrjen e S-400.
“Administrata beson se megjithatë ekzistojnë interesa afatgjatë të unitetit dhe aftësive të aleancës së NATO-s, si dhe interesa të sigurisë kombëtare, ekonomike dhe tregtare të SHBA-së që mbështeten nga lidhjet tregtare të mbrojtjes së SHBA-së me Turqinë”, i shkroi Durakoglu Pallone, i cili kryeson Komitetin e Energjisë dhe Tregtisë të Dhomës së Përfaqësuesve.
“Shitja e propozuar kërkon njoftimin e Kongresit nëse miratohet nga Departamenti i Shtetit. Ne vërtetojmë angazhimin tonë për procedurat e vendosura të autorizimit të tregtisë së mbrojtjes, përfshirë mbikëqyrjen e Kongresit”, shtoi ajo, sipas një kopje të letrës të shpërndarë në mediat sociale.
Durakoglu më tej potencoi kontributet aktive të Turqisë në NATO si dhe mbështetjen e saj për “integritetin territorial të Ukrainës dhe marrëdhëniet bashkëpunuese të mbrojtjes”, duke i quajtur ato “një pengesë e rëndësishme ndaj ndikimit të rrezikshëm në rajon”.
Departamenti i Shtetit nuk e konfirmoi autenticitetin e letrës kur u pyet nga AA, por një zyrtar i lartë i Departamentit të Shtetit tha se SHBA “e vlerëson fuqishëm partneritetin e saj me aleatin e saj në NATO, Turqinë”.
“SHBA-ja dhe Turqia kanë lidhje të gjata dhe të thella dypalëshe të mbrojtjes dhe ndërveprueshmëria e vazhdueshme e Turqisë në NATO mbetet prioritet”, tha zyrtari, i cili kërkoi të mbetet anonim./FolDrejt/
