Prej muajsh Gjermania dhe Franca kanë mendime të ndryshme për të ardhmen e BE-së, ku mes tjerash, dallimi që prek edhe trojet shqiptare është se në kohën kur kancelarja Angela Merkel mbështet zgjerimin e tanishëm të BE-së, është Franca e presidentit Emanuel Macron që kundërshton çdolloj zgjerimi, bile kundërshton edhe hapjen e negociatave me Shqipërinë dhe Maqedoninë Veriore në fund të qershorit, informon foldrejt.com.
Por kjo nuk duket fundi. Përpara samitit ku do të diskutohen rezultatet e zgjedhjeve të Parlamentit Europian, Merkel dhe shefi i Elizesë, Macron, kanë pasur një përplasje, shkak i së cilës është bërë mënyra e përzgjedhjes së presidentit të ri të Komisionit Europian.
Kreu i shtetit francez këmbëngul që procesi të mos jetë automatik. Merkel, nga ana tjetër, e bëri të qartë se Gjermania vazhdon të favorizojë zgjedhjen e kandidatit kryesor nga partia fituese e zgjedhjeve të së dielës.
Krerët e bllokut europian pritet të mblidhen në Bruksel për të folur mbi votimet në të gjithë BE-në, por edhe për caktimin e drejtuesve të rinj të institucioneve të Bashkimit Europian.
“Ne duhet të gjejmë sa më parë një zgjidhje, duke qenë se Parlamenti i ri do të mblidhet në fillim të qershorit dhe natyrshëm preferohet që deri në atë kohë të kemi një propozim nga Këshilli Europian”, ka thënë Merkel.
Ai që mbështesin aleanca konservatore CDU/CSU dhe partneri i saj i koalicionit qeverisës SPD është procesi “Spitzenkandidat”, sipas të cilit kandidati i përzgjedhur nga partia fituese votohet në PE si presidenti i ardhshëm i Komisionit Europian. Në këtë rast, Merkel, mbështet Manfred Weber si shefin e ardhshëm të KE./Foldrejt.com
