Presidenti i Serbisë, Aleksandar Vuçiq, është takuar sot me kryeministrin e mbretin e Norvegjisë, me të cilët thuhet se ka diskutuar mbi çështjen e Kosovës dhe njëkohësisht ka përmendur edhe nevojën e mbrojtjes së popullit dhe tokës serbe.
“Ju e dini që Norvegjia e diagnostikon situatën më mirë dhe më saktë se kushdo në terren dhe se është një vend që ruan paqen. Prandaj, ne folëm për Kosovën dhe Metohinë, për vetë procesin e dialogut dhe rezultatet e tij. Si zakonisht, unë nuk ia hodha fajin palës tjetër. Nuk ka dyshim se ata do të vazhdojnë ta monitorojnë atë proces”, ka thënë Vuçiq para mediave.
“Nëse Kurti thotë se për të ka mbaruar çështja e statusit, mirë, unë jam mirënjohës. Edhe për mua ka përfunduar çështja e statusit. Unë mbështetem në Kartën e Kombeve të Bashkuara dhe Rezolutën 1244 të KS të OKB-së. Nëse kjo është në pyetje, mund të them se nuk kam shumë shpresë por frikë nga ngjarjet e ardhshme. Kjo tregon se zotëri Kurti shpreson te fuqitë perëndimore se ato do ta detyrojnë Serbinë ta njohë Kosovën”, ka shtuar ai.
Vuçiq ka bërë një krahasim mes situatës së tanishme me sjelljen e dikurshme të serbëve në vitet ’90 ndaj shqiptarëve, duke thënë se edhe shqiptarët tani po e bëjnë të njëjtën sjellje.
“Ne bëheshim se nuk po ndodh asgjë, duke llogaritur edhe në forcën tonë dhe në të tjerat. Kështu po veprojnë edhe shqiptarët, duke menduar se me polici speciale mund t’i zgjidhin problemet në veri dhe në vende tjera, nuk e kuptojnë se me këto veprime vetëm e bëjnë popullin tonë më kundërshtues dhe më të vendosur ndaj tyre. Duket se ata nuk kanë dëgjuar me kujdes. Ndoshta kjo është mirë, ndoshta thash shumë”, ka thënë Vuçiq.
“Situata në veri, por edhe në pjesët tjera të krahinës, sa i përket popullit serb, fjalë për fjalë është duke vluar… Serbët janë ngopur. Të gjithë janë të ngopur. Ata keqtrajtojnë dhe torturojnë njerëzit. Kur i bashkon të gjitha këto, e kuptoni se është në pyetje një sistem sistematik persekutimi, por njerëzit kanë shpirt, thonë mjaft. Kurti i referohet çdo gjëje që i përshtatet, në asnjë mënyrë nuk i përmbahet asaj që është nënshkruar në Bruksel”.
“Shtetet e Quint-it gjithmonë do t’i mbështesin shqiptarët në Kosovë. Gjermanët janë më të zëshmit, dihet se do t’i mbështesin gjithmonë, është fëmija i tyre, nuk ka pritshmëri të mëdha nga ana jonë. Dikush mendon se kur dikush tjetër është nën presion, është e lehtë, por nuk është e lehtë. Unë jam i shqetësuar për vendin. Unë nuk jam i shqetësuar për veten time, është e jona të luftojmë dhe të mbrojmë tokën tonë”, është shprehur Vuçiq./FolDrejt/
