Inspektorati Policor i ka rekomanduar Policisë së Kosovës suspendimin e tre zyrtarëve policorë, një kapiteni, një rreshteri dhe një zyrtari policor, nën dyshimin se të njëjtit kanë kryer veprën penale keqpërdorim i pozitës zyrtare.
“IPK përmes rrugëve operative kishte pranuar një informatë se më 15.04.2022, zyrtarët policorë të NRTRR-Ferizaj e kanë ndaluar një qytetar për vozitje të shpejtë (104 km/h në zonën ku kufizimi i shpejtësisë ishte 50 km/h) dhe ia kanë shqiptuar tiketën në vlerë 500 euro, një vit ndalesë të drejtimit të mjetit motorik dhe pesë pikë negative”, thuhet në njoftim.
“Katër ditë pas shqiptimit të tiketës është anuluar tiketa e parë, i është kthyer patentë shoferi qytetarit dhe i është shqiptuar tiketë e re vëllait të qytetarit për vozitje pa patentë shofer duke e anashkaluar plotësisht Komisionin për Vendosje si autoritet i vetëm për anulimin ose jo të tiketave në trafikun rrugor, sidomos kur ka masë mbrojtëse”, thuhet më tej në njoftim.
Me këtë rast dyshimet e hetuesve të IPK-së janë se nga zyrtarët policorë, tashmë të suspenduar, është manipuluar tiketa dhe rasti./21Media