Rupi, monedha e Indisë, ka filluar përsëri të bjerë, duke shkaktuar shqetësim se ekonomia me rritje më të shpejtë në botë mund të ngadalësojë rritjen.
Valuta e Indisë për herë të parë kaloi vlerën prej 74 rupi për një dollar amerikan dhe që nga fillimi i vitit ka shënuar rënie prej 15 për qind në raport me dollarin në rritje, raporton CNN.
Qeveria e vendit disa herë ka tentuar pa sukses ta ndalë këtë rënie dhe së fundi ka futur stimuj për investitorët e huaj për të përshpejtuar blerjen e obligacioneve në monedhën vendase të lëshuara nga kompanitë indiane.
Gjithashtu, shteti ka rritur tarifat mbi produktet e importuara, të tilla si makina dhe diamante, në mënyrë që të zvogëlojë rrjedhjen e parave nga vendi.
Ndryshe, rritja ekonomike e Indisë u përshpejtua këtë vit, duke arritur në 8.2 për qind në tremujorin e mëparshëm, por duke qenë se ky vend është një nga importuesit më të mëdhenj të naftës në botë, është nën presion për shkak të rritjes së çmimeve për “ari të zi”.