Në konferencën e paralajmëruar për media, ministrja Haxhiu ka zbuluar se janë zhdukur mostrat e gjakut, urinës dhe lukthit të aktivistit të ndjerë, Astrit Dehari.
“Mbrëmë në orët e vona jam njoftuar se janë zhdukur mostrat e Astrit Deharit nga laboratori i toksikologjisë në kuadër të Institutit të Mjekësisë Ligjore. Ky është një rast i rëndë, rast kriminal. E kam njoftuar mbrëmë kryeprokurorin e shtetit, Besim Kelmendin, dhe drejtorin e Policisë, Fehmi Hotin. Sot në mëngjes e kam vizituar IML-në dhe jam njoftuar si në vijim: Në mbajtëset e epruvetave kanë qenë 15 epruveta me gjak, një e urinës dhe një e lukthit. Nga këto, dy epruveta me gjak ia ka dhënë institutit zviceran dhe një policisë për ADN. Aktualisht, sipas informacioneve, sepse unë nuk kam qasje në vendin ku ruhen mostrat, mungojnë 12 epruveta me gjak, një e urinës dhe një e lukthit. Në vendin ku ruhen epruvetat kanë qasje vetëm 3 persona, vetëm ata i kanë çelësat”, ka thënë Haxhiu.
Duke rikujtuar rastin e Deharit, Haxhiu tutje është shprehur se prej 6 vitesh është synuar të shtrembërohen provat, dëshmitarët lidhur me këtë rast.
“Kujtojmë këtu rastin e mjekëve, ekspertëve, që përgatitën raportin e veçantë mbi gjetjet e raportit të autopsisë që kishte përgatitur IML-ja”.
“Ne besojmë se ky akt i rëndë e kriminal që ka ndodhur në ambientet që do të duhej të ishin të sigurta, ka një motiv si më herët: t’i dëmtojë edhe më tej dhe përfundimisht këtë proces, si dhe të tentoj ta na vesh neve me përgjegjësi”.
“Ky akt i rëndë është vërejtur dje gjatë bartjes së mostrave nga frigoriferët e vjetër në të rinjtë, por jam e bindur se ka qenë çështje kohe që ata që e kanë orkestruar do ta plasonin si një veprim dëmtues të procesit në përgjithësi”.
“Autorët do të gjenden dhe rasti do të zbardhet”, ka shtuar tutje Haxhiu./FolDrejt/