Autoritetet shëndetësore palestineze njoftuan të martën mbërritjen e 500 mijë dozave të vaksinës kundër COVID-19 në Bregun Perëndimor të okupuar dhe Rripin e Gazës.
Dozat e vaksinës mbërritën në objektin e ministrisë së shëndetësisë në Nablus herët të martën.
Nga 500 mijë doza, 300 mijë do të mbahen në Bregun Perëndimor ndërsa 200 mijë do të dërgohen në Rripin e Gazës, tha Ministri Palestinez i Shëndetësisë Mai Alkaila, shkruan AP, transmeton Klankosova.tv.
Dërgesa ishte një donacion nga Shtetet e Bashkuara, i lehtësuar përmes nismës COVAX të mbështetur nga Kombet e Bashkuara.
Deri në 24 gusht, gjithsej 728 mijë e 426 njerëz kishin marrë dozën e parë të vaksinës si në Bregun Perëndimor ashtu edhe në Rripin e Gazës, ndërsa 441 mijë e 443 persona kishin marrë dy doza të vaksinës, sipas statistikave të publikuara nga Ministria e Shëndetësisë.
Rastet me koronavirus janë rritur ndjeshëm në Bregun Perëndimor gjatë javës së kaluar dhe ka frikë se territori mund të jetë duke hyrë në një valë të katërt të përhapjes së virusit.
Që nga fillimi i programit të vaksinimit palestinez, Bregu Perëndimor deri më tani ka marrë afërsisht 1.7 milion doza të vaksinës ndërsa Rripi i Gazës ka marrë 500 mijë, sipas ministrit.